Ном Ой тогтоолтын аргаар гадаад үг цээжлэх

Хэл сурах, судлах нь дүрэм, сонсгол, уншлага, үг цээжлэх, хэрэглээ гээд маш олон хэсгээс бүрдсэн цогц үйл явц байдаг. Өнөөдөр манайд хэлний сургалтын төвүүд олон ч дийлэнх нь суралцагчдад үг цээжлэх үр дүнтэй аргачлалыг зааж, цээжлэх дадлыг эзэмшүүлж чадаагүй байна.

Тиймээс хүүхэд, залуус үг цээжлэхийн тулд байнга шинэ үгийн картаа авч явах, урт урт жагсаалт бүхий үгтэй цаасаа гэрийнхээ хаа сайгүй нааж, тоть адил олон дахин давтаж цээжлэхийг оролдсоор. Гэсэн ч энэ арга үр дүнгээ өгөлгүй, ихэнх нь залхаж шантран, хэл сурах хүсэл эрмэлзлээ гээдэг.

Тэгвэл энэ ном тэр чигээрээ гадаад хэлний үгийг удирдаж үр дүнтэй цээжлэх дадлыг уншигч танд олгоход чиглэсэн билээ. Үүний тулд эхлээд тархины үйл ажиллагаа, хүний ой санамж хэрхэн ажилладаг, бидний тархи үгсийг хэрхэн тогтоодог, гадаад үг цээжлэх ой тогтоолтын арга гэж юу болох гэх мэт олон асуултын хариултыг та энэ номоос олно.

Та энэхүү номын хоёрдугаар хэсэгт “Barron’s TOEFL”, “How to prepare for the Test of English as a Foreign Language” номын олон нийтэд нээлттэй шилдэг үгсийн жагсаалтаас авсан түгээмэл тохиолддог 200 үгийг хурдан хугацаанд, сонирхолтой аргаар, уйдах завгүй, үр дүнтэй тогтоох болно. Эдгээр хүндэвтэр үгсийг тогтоон эргэн санаж чадсанаар та цаашид аль ч хэлний үгсийг төвөггүй цээжлэх арга барилыг эзэмшинэ.

Монгол хүний онцлогт тулгуурлан гадаад хэл сурахыг эрмэлзсэн мянга мянган суралцагчийн бодит хэрэгцээг хангахыг эрмэлзэн тус номыг та бүхний хүртээл болгож байна. Ингэхдээ шинжлэх ухааны

ойлгомжгүй хүнд хэцүү үг хэллэгээс зайлсхийж, хэн бүхний ойлгоход хялбар энгийн найруулгаар бичихийг эрхэмлэлээ. Түүнчлэн гадаад хэл сонирхон судлагч та бүхнийг шинэ үгээ цээжлэхдээ илүү ул суурьтай, ухамсартайгаар хандах хандлагад чиглүүлэхийг зорив.