Ном "Miracle Me"

“MIRACLE ME “НОМЫН ТУХАЙ

MIRACLE ME номд менежент, амбиц, хамтын ажиллагаа, манлайлал гэхчлэн тренди бүсгүйн дараагийн түвшний чадваруудыг тусгаж өгснөөрөө онцлогтой бөгөөд цаг үетэйгээ хөл нийлүүлэн алхах ажил хэрэгч бүсгүйд байвал зохих ур чадвар, мэдлэг мэдээллийг багтаасан болно. Тренди бүсгүй номыг хувь хүний хөгжлийн ном гэж тодорхойлж болох бол MIRACLE ME ном нь хувь хүний хөгжлийг менежменттэй хамтатган хүргэж байгаагаар тун сонирхолтой, шинэлэг байна гэдэгт зохиолч миний бие гүнээ найдаж буй билээ. MIRACLE ME номыг өөрийнхөө арваад жил байгууллагуудад ажилласан туршлага, уншсан, судалсан зүйлс дээрээ тулгуурлан бичсэн болно.

Эцсийн эцэст би Тренди бүсгүй номоороо ч, MIRACLE ME номоороо ч орчин цагийн, тодруулбал 21-р зуунд амьдарч байгаа хүн бүрийн мэдэж байвал зохих мэдлэг, чадварын талаар бичиж байгаа. Бас аливаа нэгэн бүлэг сэдвийг бичихдээ гадаад, дотоодын олон эх сурвалжуудыг уншиж судалсан ба түүнийгээ аль болох энгийн үг хэллэг ашиглан та бидний амьдралд ойрхон байдлаар илэрхийлэхийг зорьсон бөгөөд хөрсөн дээр буулгахыг ихэд хичээв. Зарим бүлгүүдэд дахин сануулах зорилгоор өмнөх Тренди бүсгүй номын үргэлжлэл, утга санаа, хэсгүүдээс орсон болно.

Та ямар ажил, мэргэжил эрхэлдгээс үл хамаарч энэхүү ном танд маш ойлгомжтой, шууд хэрэгжүүлэхүйц чухал санаануудыг өгөх тийм л ном байгаасай гэж би хүсэж байна. Ер нь номын үнэ цэн уншигчдаа юу үлдээж байна вэ? гэдгээр тодорхойлогддог. Хэрэв та аливаа нэг номоос амьдралдаа хэрэгжүүлэх нэг ч гэсэн санааг ойлгож авсан бол өгөөжтэй ном уншсан байна гэсэн үг. MIRACLE ME ном танд өөрийнхөө гайхамшигтай хувилбарыг бий болгоход туслана гэдэгт найдаж сууна. Ингээд надтай хамт цоо шинэ аялалд гарч, цоо шинэ мэдрэмжүүдийг авч, эрч хүчээр цэнэглэгдэхэд, ГАЙХАМШИГТАЙ БИ-гээ олоход бэлэн үү хонгор минь?