Ном Тэнгэрийн судар

Монгол үндэстний түүх-уран зохиолын алдарт дурсгал "Монголын Нууц Товчоон"-ы утга агуулга, үг хэллэг, бүтэц зохиомжийн талаар дотоод, гадаадын олон эрдэмтэд зуун тавь гаруй жилийн турш анхааран судалж, түүний түүхэн улбаа, уран дүрслэл, хэлний онцлогийн талаар олон арван ном зохиол, олон зуун судалгааны үгүүлэл нийтлэгдсэн хэдий ч монгол үндэстний зан заншил, аман уламжлал, сэтгэлгээний онцлогтой шууд холбогдох олон асуудал бүрэн тайлагдаагүй байсаар байгаа билээ.
Зохиолч Г.Аюурзана "Монголын Нууц Товчоон"-ы энгийн уншигчийн хувьд үсэг залгин уншаад өнгөрсөнгүй, харин түүнд шингэсэн үндэстний зан заншил, домогийн сэтгэлгээ, аман уламжлал, уран дүрслэл, тайлал хүлээсэн нууцлаг үг үгүүлбэр, нарийн нандин шигтгээ бүрийг шимтэн шимтэн уншиж, ухаж ойлгосоноо, бодож бясалгасанаа уншигч олонтойгоо хуваалцахын тул энэхүү бүтээлээ туурвижээ.