Алтан тугал o3130

Алтан тугал o3130 Явган зорчигчдыг хайрлах хэрэгтэй. Явган зорчигчид хүмүүн төрөлхтний дийлэнх хэсгийг бүрдүүлнэ. Дийлэнх төдийгүй хамгийн чансаатай хэсэг нь тэд. Явган зорчигчид л ертөнцийг бүтээсэн. Чухамхүү тэд л хот суурин босгож, олон давхар барилга байшин сүндэрлүүлж, цэвэр, бохир усны суваг хоолой татаж, гудамж талбайг цардаж, гудамжийг цахилгаан дэнлүүтэй болгосон билээ. Чухамхүү тэд л дэлхий даяар соёлыг түгээж, ном барлах аргыг сэдэж, дарийг бодож олж, гол мөрний дээгүүр гүүр барьж, мисирийн ханз үсгийн нууцыг тайлж, сахлын ялтсан хутгыг хэрэглээнд оруулж, боолын худалдааг устгаж, шар буурцгаар зуун арван дөрвөн төрлийн амт шимт төгөлдөр хоол хийж болохыг тогтоосон болой. Ингээд хамаг юм бэлэн болсон хойно. төрөлх гараг маань харьцангуй овоо төвхнөсөн дүрийг олсон хойно машинтнууд гарч ирэх нь тэр. Автомашины ч гэсэн явгачуул зохион бүтээснийг бас дурдах хэрэгтэй юм. Гэхдээ машинтнууд энэ тухай учиргүй түргэн мартсаныг яана.